السلام عليكم ورحمه الله وبركاته
الموضوع من اولها كده هيكون طويل جدا
الموضوع ده حكايه يومين فى سنتين مختلفتين ويعتبروا من اكتر الايام اللى بكره فيها نفسى فى الجامعه
انا دلوقتى الحمد لله بحاول اطلع نفسى من المود ده بس حسيت ان لازم اكتب اللى حصل ليا فى اليومين دول
نبدا بسم الله
يوم الاربعاء 31/12/2008
يوم امتحان الشفوى داتا بيز
نازله من البيت عادى ولا زعلانه ولا فرحانه
اولا حصل موقف غبى واحنا فى الموصلات نرفزنى شويه هديت لوحدى وقولت اعديها مفيش حاجه مستاهله
وحاولت ارجع طبيعيه تانى
ووصلنا الجامعه المفروض ان علينا محاضره وبعدين امتحان حضرنا المحاضره عادى هو كان المود شويه وحش بس عادى يعنى
بعدين جه وقت الامتحان
الدكتوره قالت الكل يطلع بره وهدخل بارقام الجلوس عشره عشره كده قولت اوك
يبقه انا هكون فى الاول لما اقف هنا عشان مش تنادى عليا وانا مش موجوده
وقفنا ربع ساعه نص ساع ساعه ولسه مجاش معياد انى ادخل (طبعا ده وسط زحمه بره المدرج )
استغربت وفجاه لاقيت فى ناس بتدخل قولت اكيد ميعاد جه دخلت لاقت بسم الله ما شاء الله كل الدفعه قدم الدكتور ولاد على البنات
انا اكتر حاجه بكرها فى حياتى وبجد بتعصبنى الزحمه وعدم النظام وخصوصا لما يكون فى ولاد مش ملاحظين المفروض ان فى بنات موجودين ما علينا
لاقيت النظام ان اللى يلحق يمتحن طلعت بره وقولت شويه وابقه ادخل العيال جم نادوا عليا يلا تعالى عشان تمتحنى دخلت فضلت واقفه وبرده مش عارفه امتحن اتخنقت وشى احمر جدا عيطت وانا واقفه غصب عنى
طلعت بره انهيار فى العياط العيال قعدوا يهدوا فيا وكده شويه وقالوا الدكتور بتقول كل حرف الف يجى وقولتهم مش همتحن
قالولى بس تعالى دخلت لاقيت الوضع كما هو عليه كنت هطلع مسكوا فيا بالعافيه وواقفونى جنب الدكتوره
وقولت انا بقالى ساعتين ساكته لما اسالها كده هو انا همتحن امته
فلسه بقولها يا دكتور حرف الالف هيمتحن امته
لاقيتها لفت وقالتى هو انتى لسه ممتحنتيش قولتلها اه قالتى ليه
بجد غصب عنى وفجاه قعدت اعيط قدامها وقدام كل دفعه ولاد وبنات(كرهت نفسى و دموعى كره)
المهم الدكتوره قالتلى مش هسالك عشان انتى مهذبه وساكته من الساعتها والكلام ده
وانا اصلا مش مركزه معاها
اخدت اسمى وشيتى واعطتنى الدرجه والكل قعد يهزر وكده ويقولو احنا هنعيط احنا كمان والكلام ده فقولت لدكتور تسالنى
قالتى لو سالتك هيكن عشان خايفه احسن العيال دول يحسدوكى ومش تروحى بيتكم النهارده
المهم البنات كلهم قالولها لا يا دكتور مش تساليها وخليها تروح كل ده وانا مش مستوعبه
بعد ما خلصت وطلعت بدات احس انى عيط قدام ولاد وبنات والدكتوره كمان
يالهوى ايه ده ضحكت على نفسى وفى نفس الوقت اتحرجت جدا
المهم روحت البيت لاقيت ماما تعبانه قولت الله المود زباله طول النهار ودلوقتى كملت
قعدت مخنوقه وطول الليل اعيط وحالتى حاله الناس كلها استقبلت السنه الجديده بابتسامه وانا بجد مستقبلها بدموع
حتى وانا قايمه ابوس راس ماما الساعه 12 واقولها كل سنه وانتى طيبه دموعى نزلت جريت على الاوضه عشان مش تشوفنى وقعدت اعيط ونمت على كده وانا مخنوقه واليوم خلص بالاحراج اللى فيه
اليوم التانى
الخميس 1/1/2009
امتحان عملى داتا وامتحان شفوى اساليب بحث علمى
برده وانا لسه نازله الصبح حاولت اكون طبيعيه وانسه الخنقه اللى انا فيها (لازم اتغلب بجد على الحزن )واحاول اضحك وكده يعنى كنت بضحك بس اللى يعرفنى يعرف انى بضحك غصب عنى
المهم الامتحان بتاع العملى كان الساعه 9 للمجموعه 1و2 المفروض يعنى
المهم رحت عند المعمل الساعه 9 لاقيت نص الدفعه هناك وكلهم ولاد استغربت بس قولت مش مهم سالت العيال الامتحان بدا
لا لسه
اوك هستنه بره شويه تكون مجموعه 1 خلصت عشان ندخل احنا
دخلت بعد نص ساعه كده
لاقيت ناس من سكشنا جوه قولت طيب العيال وقفونى معاهم عند الباب كده
المهم كل شويه القى ولاد بيزيدوا وانا مستغربه من الزحمه وبحاول ارجع على البرامج
وطبعا انا واقفه بس متحوطه بكل اللى حواليا بنات
اللى جوه طلعه ندخل احنا بقه
البنات عرفنى لانى لو مت مش هعرف ادخل فى الزحمه دى مسكوا ايدى عشان يدخلونى راحين ندخل لاقين هجوم ولاد وقولت ماشى ما علينا وقفت تانى يجى نص ساعه كمان غير النص ساعه الاولى
وبرده جه المره دى وصاحبتى ماسكه ايدى عشان تدخلنى معاها فجاه لاقيت ايدى فى مكان وانا فى مكان وفى النص ولاد شديت ايدى وقولت مش عاوزه امتحن
ووقفت شويه لاقيت ولاد جاين يقفوا جنبى طبعا ضغطى ارتفع
ولا واول مره فى التاريخ
يحصل الاتى
ازعق لولد
يالهوى انا عملت ايه قولتله ممكن لو سمحت تبعد شويه بصوت عالى واخدت نفسى شويه كده لغايه ما استوعبت اللى حصل
وطلعت جرى على بره عن اصحابى
لانى كنت هعيط زى امبارح (دموعى مش عارفه كانت حاضره اوى اليومين دول)
طلعت حاولت انسه واتكلم مع اصحابى واضحك واهزر بس برده المود غالب كل ماجى اضحك افتكر ماما مثلا
او افتكر موقف الزعيق ده
او اعصابى تتعب بسبب الزحمه
كنت تايه بجد اليوم ده
انا من النوع اللى لو حس بتوتر كتير وزحمه وكده اعصابى بتتعب بسرعه وافضل مش مركزه
احنا لو جالنا ضيوف كتير اوى بحس ان اعصابى تعبانه انا بحب الناس واحب اتكلم معاهم بس مش بحب الزحمه
المهم
انا برده لما اعلى صوتى فى الجامعه ممكن الناس تشوف ان ده عادى بس انا بضايق وبروح افضل مضايقه طول النهار
المهم فضلت واقفه وارحه وجايه وحاجات كتير كده لغايه الساعه 2 باين كنت خلاص فاض بيا قولت اقعد اهدى اعصابى شويه عشان متنرفزش ودموعى متنزلش حبساها من الصبح
المهم جه ميعاد امتحان الدكتور مجدى دخلت امتحنت سبحان الله امتحان جه بسرعه اهوه
والعيال كلهم قعدوا يطمنو انا امتحنت ولا لا وخايفين اعيط
المهم كل ده ولسه ممتحنتش العملى الساعه بقت 3 ولسه من 9 الى 3 واخدين بالكم
كل الاقسام خلصوا ولسه احنا والحمد لله الساعه باين 3ونص دخلنا كنا اخر ناس امتحنا وطلعنا اخر ناس من الكليه
العيال قالوا ناكل انا طبعا ماشيه على اخرى حاسه انى لو معيطش هموت قولت اموت بس معيطش تانى فى الجامعه(لان اصحاب النفس الضعيفه بيفهموها حاجه تانيه وانا مش ناقصه)
المهم اشترينا الاكل وقعدنا ناكل اكلى فضل زى ما هو والسماء تمطر وانا اعيط قعدت يجى نص ساعه او اكتر اعيط فى جنب كده والعيال خلصوا اكل ومشينا احاول اوقف الدموع مفيش فايده
مسكتها بالعافيه بس وشى كان احمر وعنيا رهيبه
المهم روحت وانا خلاص مخنوقه طبعا كنت اطمنت على ماما بالتليفون قبل ما اروح ولاقيت صوتها تعبانه وده كان القشه اللى قسمت ظهر البعير وخلتنى اعيط كتير كده
المهم روحت لاقيت ماما قاعده لاقت وشى تعبانه وشكلى معيطه لسه بتسالنى قعدت اعيط عياط يالهوى وشكيت ليها كل حاجه قعدت تهدى فيا وبعدين قعدنا شويه ودخلت نمت بكده اوحش يومين عدو بجد وانا تعبانه جدا
هتقولوا ايه اسباب الدموع دى كلها هقول
1-تعب ماما
2-ضغط امتحانات وعدم نظام وبجد يعنى وسورى قله ذوق ولاد
3-مواقف غبيه من ناس مش متوقعه منهم كده
4-الزحمه الزحمه الزحمه +صوتى لما كان عالى
5- كنت تعبانه جدا عضويا فى اليوم ده
6-عدم مبالاة ناس للى انا فيه وكل همهم يلا نفسى
كله يعطى ضغط اعصاب مما يؤدى اللى انفجار
وموضوع بالطول الغبى ده
ياريت متقراهوش عشان متتعبوش انا كتبته بس عشان حاسه ان كنت عاوزه اكتبه
سلام
ملحوظه بجد عاوزه اقول شكرا بجد
للبت مى رجب بجد ربنا يخليها هى وناهد مش هنسه موقفهم
وايمان السيد رزان
بجد عملتوا معايا حاجات مكنتش متوقعها بجد ربنا يخليكم
نور القلب
