معلش بجد زوتها معاكم كل شويه موضوع

بس لما اكون مكتئبه بنزل مواضيع كتير

يارب يعجبكم لانه عجبنى جدا
((حتـــــــى التجمـــــد...))
عندما اشعر انك كقطرة دم..
قدر لها ان لا تتجاوز جدران القلب..
أكون مجبره على التجمد..


عندما افكر فيك..
وكل خليه في راسي تتوسلني الانشغال بك..
فيصيبني الشلل..
وافقد الاحساس بكل شيء
في الوقت الذي احتاج فيه لان اشعر بك..
اكون مجبره على التجمد..

عندما يصبح الضحك مؤلما..
والابتسامه اشد ايلاما..
واشعر انني كقطرة ماء تتغلغل بكبرياء..
في جراح الصخر..
اكون مجبره على التجمد..


عندما يدفن الحزن مشاعرك..
ويصبح البكاء منجل..
ولا املك ان اوسيك..
اكون مجبره على التجمد..


عندما يصبح الفرح مؤلما..
والتعبير عنه اكثر الما
فلا املك الا التنفس بعمق..
اكون مجبره على التجمد..


عندما اشتاق البوح..
وتستبد لغة الصمت..
وتتضائل نبضات القلب..
اكون مجبره على التجمد..



عندما يطول غيابك..وانام كثيرا حتى تعود..
لا حبا في النوم ولكن..
رغبة في ان يشعر من حولي
بمدى المي..
فيحترمون جرحي
عندما لايحصل هذا ولا ذاك..
اكون مجبره على التجمد..


عندما يزداد الحب الما..
واحتاج الى رؤيتك..
وابحث عنك في عيون الاخرين ولا اراك..
تشتد رجفة القلب..
واكون مجبره على التجمد..



عندما تتجاوز الدموع حدود وسادتي..
وتنتحر على اعتاب سريري..
وتعجز الرياح ان تدفع ستائر النافذه..
لتجفف الارضيه..
اكون مجبره على التجمد..



عندما يكون للكرم معنى اخر..
غير الذي الفناه..
معنى تكرهه النفس..
كتلك المضغه التي تنبض بكرم..
اكون مجبره على التجمد...



عندما اشعر بان كل مافي الدنيا مؤلم
ولا استطيع ان احقق مااريد
واعيش كما تريد
واحلم بمانريد
اكون مجبره على التجمد...

نــــور القلب

اولا السلام عليكم ورحمه الله وبركاته

ثانيا هسال سؤال واحد

هل قبل كده اتهانت وقعدت ساكت ومتكلمتش؟؟؟؟؟

مش عشان انت مش قادر لا عشان بتهايلى انت اكبر من انك تتكلم

الكل لسه مش عارف انا بتكلم عن ايه

انا بتكلم عن الاقسام

(IS&IT&CS)

لييييييييييييييييه العباقره واللى مفيش زيهم هما سى اس

والصفوه وولاد الدكاتره هما اى تى

وممكن نقول الخدم او عامه الشعب اللى يتميزوا بالغباء هما اى اس

بجد نفسى اعرف الكلام ده مبنى على اى اساس

محضرتش فى مكان سواء محاضره قاعده مع اصحابى منتدى بلوجات كل مكان

نازلين شتيمه فى اى اس

اولا قبل ما اكمل كلامى انا اصلا كنت اى تى

والحمد لله تقديرى السنتين ونص دول جيد جدا (دى يعنى عشان اى تى)

يعنى مش هتقولوا عشان معرفتيش تتدخلى غيره فبدافعى عنه لا

بس بجد بستغرب ليه اى اس بيتقال عليه كده

فى الترم اللى فات قالوا قسم الروقان

اوك مكنش فيه ضغط جامد بس

سى اس هما كمان كان عندهم ماده للدكتور مأمون

واى تى الحمد لله كانوا بيوزعه عليهم امتيازات بالهبل

والترم ده الحمد لله كلنا زى بعض ونفس الضغط يبقه ليه الشتيمه

حاجه كمان

انا بتهايلى فى اى اس ناس كويسه جدا مش هقول طلابه

هقولكم احسن ناس فى الكليه طالعين من اى اس

وبيوصلوا المعلومه ووشهم بيضحك لوحده وكل حاجه من وجهة نظرى حلوه فيهم

باشمهندسه سما

الباشمهندس سمير

وغيرهم وغيرهم

بس دول اللى جربتهم

يبقه ليه اى اس وحش

يعنى لما الكل يدخل سى اس واى تى عشان القسم النكره التانى ده وحش يبقه ليه الكليه حطته عندنا ما كانت تشيله

عارفين بتفكرونى بايه

بكليات القمه

الطب

هندسه

صيدله

والباقى يبقه انتى متعلمتش

نفسى الناس تغير ثقافتها شويه بجد

وتحاول تحترم شعور غيرها

محدش عارف كل واحد دخل القسم ده ليه

فى ناس دخلت لانه عندها القدره على التحليل والكلام والحاجات دى

وناس لان الحظ مش حالفهم مثلا وجابوا مجموع اى تى

(على فكره فى ناس كتير كويسين جدا بس تقديراتهم وحشه)

وفى ناس زى حالتى

اولا مش بحب البرمجه او حاسه نفسى مش فيها

وثانيا لظروف خاصه هنا فى البيت لا تتناسب الا مع اى اس

بالنسبه بقه لاى تى

ناس دخلت حبا فى القسم

وفى ناس لمجرد انها دخلت قسم جديد قسم الصفوه

وبتوع سى اس نفس الحكايه

وبعضهم ناس دخله عشان يتقال عليهم عباقره وهما مش عارفين الموس من الكيبورد

واكيد هيبانوا فى اخر السنه

يبقه ليه مش نسيب كل واحد مع نفسه

ومش نقارن مين احسن من مين كل واحد حلو فى منطقته

يبقه ياريت كل واحد يحاول يحترم شعور الاخر

ولو حد عنده راى تانى غيرى او شاف انى قولت حاجه مش موجوده فى الواقع لو تعديت حدودى يتفضل يقول

بجد فى كلام وكلام وشحنه غضب نفسها تتطلع على قد ما اقدر كتماها

فى النهايه كلنا فى كليه واحده

كليه الحاسبات والمعلومات

نور القلب

السلام عليكم ورحمه الله وبركاته

كان يا مكان يا ساده يا كرام ما يحله الكلام اللى بذكر النبى عليه الصلاة والسلام

عليه الصلاة والسلام

كان فى امير اسمه وليد

واميره اسمها ايمان

الامير وليد اعجب بالاميره ايمان من سنين طويله

والاميره ايمان لما تكن تشعر بذلك الاعجاب

وعندما اعترف لها

شعرت هى الاخر بنوع من الاعجاب

ثم الحب الشديد

وبعد معرفت شعور كل من الطرفين

تم الارتباط الرسمى

فقد تم عقد خطوبه يحضرها الاهل والاقارب فقط

وظل الامير وليد حبه يزيد تجاه الاميره ايمان

وهى يزداد حبها اضعاف الاضعاف

حتى حان الوقت لتحديد موعد لتتويج ذلك الحب

ولكن تاتى الرياح بما لا تشتهى السفن

فجد واجه ذلك الزواج اموار عجيبه وغريبه

ولكنهم اصروا

حتى حانت الفرصه

وكانت يوم 5/3/2009

وفرح الجميع بذلك الحفل وبذلك الحب الجميل

الذى لمسه الجميع

فى ذلك الحفل

وتم زفاف الامير وليد على الاميره ايمان

فى سلام

طبعا ايمان دى مش انا ايمان دى مرات اخويه

وطبعا اخويه وليد

فرحهم كان يوم الخميس اللى فات

وبجد ده يعتبر اعز اخ على قلبى

وفرحت ليه جدا وبجد فرحت اكتر بحبهم هما الاتنين وانه انتهى بنهايه سعيده يااااارب تكمل على خير ويرزقهم الذريه الصالحه

وعقبال كل الناس ان شاء الله

وطبعا اول ما نزلت الجامعه ناس من اصحابى يعرفوا وناس لا

اللى يعرف يقول مبروك واللى لا يقولى هو انتى اتخطبتى ههههههههههه

لا يا جماعه كان فرح اخويه

وانا كتبت الموضوع ده لانى بجد كنت فرحانه جدا بالفرح ده لانه جمعهم على خير الحمد لله

وحبيت اشرك الناس معايا الفرحه

حد عنده اعتراض

طبعا لا

عشان دعيت ليكم ان كلكم تتجوزا اااااااااااااه يا اروبين

وطبعا ميرسى لكل من رورو (رنا)و دودو وسيما وفايزه على حضور الفرحه

وطبعا ميرسى لبيرى ومش زعلت خالص لانى قدرت الظروف وربنا يشفى طنط

وطبعا ميرسى لكل اللى اهتم بالفرح وقالى مبروك

ملحوظه

الحمد لله كل الجروب نجح الحمد لله ويارب نطمن على بيرى قريبا بس اكيد ان شاء الله ناجحه

واكيد فى بوست للنتيجه بس لما تبان رسمى

سلام يا كتاكيت

نور القلب

-سلامو عليكوا...وراكوا تاسكات
-سلامو عليكوا ... ال proposal يجينى المرة الجايه
-سلامو عليكوا ... تعملى مشروع مطلوب فيه كل حاجه انت اتعلمتها ومش اتعلمتها من اول مدخلت الكليه

اى حد بقى يدخل يقول سلام عليكم بقيت بخاف منه :S

كده بجد كتيييييييييييييير يعنى

والله بجد انا بقيت اخاف احضر الاقى حد يطلعلى بحاجه تانيه مطلوبه

نفسى الوقت يقف شويه

انا مش فاهمه بجد المفروض اننا نركز فى كل ده فى نفس الوقت ازاااااى ???

واحنا اصلا اساسا مشغولين بنتيجه وبتاع

لا واجى اسأل الدكتورة اللذيذة تقولى

انا لسه مشتغلتش فى النتيجه

تيب ؟ تيب

-ياسلااااااام ..ده على اساس انك مالكيش نفس ولا ايه

ماعلينا وقلنا خير وكل تأخيره وفيها خيرة خلينا فى المشاريع دلوقتى وبلاش افكر فى حاجه تانيه

لكن الغريب فى موضوع المشاريع الكتييير دى

ان الدكتور بيطلب حاجه ويتضح فى السكشن ان المطلوب حاجه ..قصدى ..حاجات تانيه خااالص

والاقى دكتور بجد مالوش اى علاقه بالتدريس وداخل التدريس ده غلط وبيشرحلنا مادهالمفروض انها تقيله وبيحاول يفهمنا حاجات هو اصلا مش فاهمها ده حتى معرفش -1 +3 يساوى كام فتح الكتاب عشان يتأكد

يااااااااربى عليكوا ...بتدققوا فى حاجات تافهه

ودكتور تانى داخل بكل بروووود وهدوووء وشلل

يقولك انا نظامى كذا وكذا وكذا ومافيش نقااااش

انا مش بقولكم عشان اخد رأيكم فى اللى هاعملوا معاكم فى الماده والمشروع

انا بس بديكم خبر

- كتر خيره والله

طبعا طبعا طبعا ده كله فى الدكاترة بس المعيدين بقى دول كوم تانى خاالص

على راسهم توتى فروتى اللى مش بيجى الكليه غير يوم واحد فى الاسبوع

وبيجى حاطط الصن بلوك بتاعه عشان الشمس

وبيجى متاخر على مايفطر ويكلم خطيبته وعلى مالشمس تروح شويه اكيد

-ده لو جه يعنى

حاجات كتيير اوى بفكر فيها وحسه ان الموضوع بدأ يبقى اوفر

مليون حاجه بفكر فيها فى نفس الوقت والاكيد انى مش بوصل لاى حل غير انى بلاقى مزيد من التوتر والقلق مصاحب بحاجات كتير كده

بجد من اول الترم كده وانا حسه انى مضغوطه اووى والحمل كبير علينا وكله فى نفس الوقت ..

غير كل حاجه تانيه بفكر فيها

نفسى الوقت يقف شويه اخد فرصه افكر فى كل حاجه منهم واديها حقها عشان اقدر انفذها

انا عارفه ان تقريبا كلكم كده

بس انا كنت متضايقه اوى وحبيت اخرج اى حاجه من اللى جوايا

ربنا يستر ويعديها على خير

سلاااااااااام

*******************

bosycat