السلام عليكم ورحمه الله وبركاته
معرفش ليه بتكلم
بس والله حسيت انى محتاجه افضفض لان جوايا مشاعر صعب ان انسان يتحملها لوحده
زى النهارده
كانت كل حاجه بتحصل كانت اخر حاجه بس للاسف مكنتش اعرف
حد يعرف ان كل حاجه هيعملها مع حد هتكون اخر حاجه امته
للاسف محدش يعرف والا كان زمانى عملت كل حاجه حلوه ليها فى اخر حاجه دى
زى النهارده اخر كلمة ماما قولتها وهى سمعتها وحستها
زى النهارده كان اخر ضمه اخدتها من امى وهى حاسه بيا
زى النهارده كان اخر دمعه بكتها ع صدرها وهى مسحتها
زى النهارده كانت اخر كلمة بنتى سمعتها
زى النهارده كانت اخر نظرة حب وخوف وحيره وحنان ووداع شوفتها من عنيها
زى النهارده كان اخر نظره لعيونا وهى بتودع بعضها
زى النهارده كان اصعب احساس بالم شعرت بيه فى حياتى بس للاسف الحاجه الوحيده دى اللى مكنتش اخر حاجه
لانى بشعر بيها النهارده زى اللحظه دى كنت فى حضنها بشعر بالحنان والحب والدفىء معاها
بس للاسف فى نفس اللحظه دى نفسى ولو فى ضمه ترحمنى من جفا الناس وغدر الايام وبرد الليالى
تملىء الفراغ اللى سابته جوايا
مش مصدقه ان كلها ساعات بسيطه ويكون مر ع وداع امى سنه
لان الالم لسه بقوته يمكن دموع العين جفة بس دموع القلب بتنزف
ويمكن بحيى ابتسامتى ع وشى بس بحياتها دفنت قلبى
حاسه انى محتاجاكى اوووووووووى يا امى اوووووى وحشتينى جدا
مش متخيله بجد ان معدتش هقول يا ماما
مش متخيله ان معدتش هشوفك واضمك واعيط فى حضنك
مش متخيله انك مش تحضرى فرحى ولا عنيكى تدمع لما تشوفينى فرحانه وتحسى بفرحة عمرك بيا
مش متخيله البس الفستان الابيض من غير ما تكونى اول عين تشوفه
مش متخيله ان اجيب اطفال من غير ما قولهم دى جدتكم اطيب واحن جده فى الوجود
مش متخيله انى هكون وحيده من غيرك تعملى ليا احلى حاجه وتفرحى ليا وادلع عليكى واقول للعالم كله دى احلى ام فى الدنيا
دى امى
كان نفسى تكونى جمبى فى كل لحظه بس للاسف
حاسه انى معدتش بتمنى اللحظه دى لانك مش فيها هتكون ناقصه هتكون زى الصوره اللى من غير الوان
ياريتك يا امى تيجى تانى
انا مش عارفه فات سنه ازى عليا من غيرك
انا اتخرجت يا امى اللحظه اللى كان نفسك فيها وتشوفينى وانا بتكرم للاسف مش كنتى فيها
واخويه جه من السفر اللى كان امنيتك تشوفيه وللاسف برده مش شفتيه
جالى عرسان كتير يا امى بس معدتش عندى نفس اعيش حياه من غيرك كنت برفض الاول عشانك ودلوقتى برفض عشان مش قادره اعيش من غيرك
والله يا امى بعيط بدل الدموع دم لما افتكر انى زعلتك منى ولو لحظه
لاول مره فى حياتى يا امى احسد حد ع حاجه ولا اقولك انتى بجد مش ربتينى ع الحسد اول مره اغبط حد ع حاجه اوى كده
لما اشوف بنت ماشيه مع امها
ام فرحانه لبنتها بنت بتدلع ع امها ام خايفه ع بنتها حاجات كتير يا امى وحشتنى ونفسى احسها تانى اوى
وحشنى خوفك عليا وحبك ليا ودلعك فيا وحشنى غيرت الناس وهما بيقول هو مفيش حد عنده بنت غير انتى
وحشنى كل كلمه تقوليها تضيفى بعدها عشان ايمان
دلوقتى يا امى كل ما حد يشوفنى يقول قد ايه كنتى بتحبينى ومفيش لحظه مكنتيش بتجيبى سيرتى فيها
وحشنى كل حاجه وحشتينى بجد
سنه يا امى سنه يعنى زى بكره كانت روحك بتودعنى
ياااااارب يا امى تكونى مرتاحه
حتى لو انا بتالم
انا طول عمرى كنت بتمنى اتعب وانتى لا ربنا ياخد روحى وانتى لا
ودلوقتى بتمنى انك تكونى مرتاحه ومش مهم انا
بحبك يا امى ومحتاجاااااااااااااااااااااااااااااكى اوى محدش بيحس بيا زيك انا بتألم والله العظيم بتألم يا امى
وفات سنه ولو الف سنه هتفضلى فى كل ركن فى قلبى وفى كل غمضة جفن لعينى وفى كل لحظه من حياتى

عاشقـــــــة امهـــــــــــــــــــــــــا