بجد حد يخبينى
طول النهار بتمنى حد يخبينى
النهارده اتعرضت لاكبر موقف محرج فى حياااتى
والمشكله انى اتاخدت على خوانه
راحه فى امان الله الجامعه وكان المفروض علينا مناقشة مشرووع النهارده
والمفروض برده انى راحه ايزى خالص وولا فى دماغى الموضوع لان المفروض ان سالى هى البريزنتر بتاعت التيم
اول ماروح السكشن الاقيهم بيقولولى انتى اللى هتقدمى
هاقدم ايه ياجماعه..انتوا بتستعبطوا ..
ده انا ممكن اوديكم فى داهيه
المهم قعدت واخداهم على قد عقلهم واقولهم اكيد لا سالى اللى هتقوم
الاقى البشمهندس سمير بينادى اسمى
اول مرة
- ياسمين
محدش رد..
-ياسمين محمد
محدش رد ..
-ياسمين فين ياجماعه
قولت مافيش فايده هى مكتوبالك الجوازة يابولين
قاللى اتفضلى قومى اتكلمى عن المشروع
وماادراكم انا كنت ازاااىوشى جاب الوان الطيف كلها
وجسمى كله بيرتعش
واتلبخت لبخه سودا
بس الحمدلله بدأت اتمالك اعصابى شوية بشويه
لحد ماقدمته كله الحمدلله ولا قيته بيقولى قدامك دقيقتين كمان بس
فقلتله الحمدلله انا خلصت
وقمت راحه اقعد لاقيته رجعنى تااانى وقاللى استنى يمكن حد من زمايلك عايز يسال عن حاجه
فالمهم وقفت تانى
وبعدين بقولهم ها ياجماعه فى حد عايز اى سؤال ياريت لا ههههههههههه
يعنى بسال وبرد فى نفس الوقت
والحمدلله خلصت فى الوقت المحدد
والمشروع عجبه جداا وكان مقتنع بالافكار والحلول اللى فيه
وانا لحد دلوقتى مش متخيله اصلا انى عملت كده
وكل مافتكر وشى يجيب الوان
وكل مافتكر الموقف بتاعه لما لاقانى برتعش وخلاص بموت وانا واقفه
لاقيته جاى عندى وقعد يرتعش كده ويقولى اهدى شويه
بجد ببقى خلاص هموت من الكسوف
وفى الاخر كان نفسى حد يصورنى والله عشان اتريأ على نفسى شويه وانا مبرحمش نفسى اصلا
يلا الحمدلله عدت على خير بدون خسائر فى الارواح
والغريبه انى عجيتهم وانا بمنظرى ده
بجد يوم مش هنساه لانه اول تجربه ليا فى الحكايه دى..وكمان مكنتش محضره نفسى
وعشان كده حبيت اسجل اليوم ده
سلاااااااااام
*************
BosyCaT
