باركووووولى :)

النهارده يوم من اسعد ايام حيااتى ..
النهارده كانت خطوبه صاحبتى واختى سمر :)
سمر دى اختى اللى مولدتهاش امى بجد ..دايما بقول ان عندى 4 اخوات بنات
انا وسمر اصحاب بقالنا 14 سنه .. قولوا ماشاء الله :D
لو فضلت احكى عن سمر وعن هى ايه بالنسبالى هحتاج بلوج جديده كامله
النهارده اول ماشوفتها عروسه ولابسه الفستان ...انا جالى مليون احساس فى وقت واحد
عدى عليا فى لحظات ..كل ايامنا مع بعض كل دقيقه عشناها سوا ..
كنا بنزاكر ازاى.. وبنلعب ازاى...وبناكل مع بعض ازاى ...وبننام مع بعض ازاى
عشرة 14 سنه عدت عليا فى دقيقه بكل الحاجات اللى فيها...
مكنتش مصدقه ان خلاص احنا كبرنا ..وانى بشوف صاحبة عمرى قدامى عروسه
وكل شويه بيبقى هاين عليا اقولها قومى اقعدى معانا وبتاع ..وشويه وهاقولها عايزاكى فى موضوع ..ولا كأنها العروسه :D
بجد مكنتش متخيله كمية الفرحه اللى هتبقى جوايا فى يوم زى ده ..وطول الحفله وانا ببصلها واضحك وادمع فى نفس الوقت
وبغض النظر عن انى كنت عاملة زى ام العروسه ..وكنت دايخه وراها
بس ده ميجيش حاجه جمب لحظه فرح واحده من اللى حستها النهارده
وانا بفرح باختى الرابعه :)
يمكن انا عارفه انها مش هتشوف الكلام ده
بس انا عايزة اقولها ربنا يتمملك على خير ..ويجمع بينكم..ويوفقكم فى حياتكم القادمه ..
وعقبال يارب ماشوفها لابسه الفستان الابيض هى وكل اصحاابى :) :)

سلااااااااااااااام 

***********

bosycat