السلام عليكم ورحمه الله وبركاته
طبعا انا مدبسه تدبيسه تمام
من ميمى وايمى بجد ليهم يوم

وبما انى انا حاليا على البلوج فهرد انا
وهوصل للباقى عشان يدخلوا يجاوبه اشمعنه انا يعنى

اتكلمت اكتير لما ادخل لقدرى

س1 : أذكر خمس أحلام على الاقل ..تخص مستقبلك؟
1-ربنا يوفقنى واخلص دراستى على خير وافضل ناجحه دايما ولو فيه نصيب ولازم اشتغل ربنا يبعت ليا شغل كويس واجتهد فيه
2-ربنا يشفى امى وتفضل معايا طول عمرى وتفرح بيا وباخواتى لان دى امنيتها
3-ربنا يرزقنى بالزوج الصالح والشخصيه اللى بتمناها فى خيالى واللى مستنيها طول حياتى
4-اشوف اخواتى رجاله بجد محترمين جدااااااااا
5-ربنا يخلى ليا اصحابى ومش نبعد عن بعض ابدا
6-معلش هما 6 ودى الاهم ربنا يرزقنى راحة البال والامان طول حياتى

س2 :أذكر شخصين على الأقل غير متواجدين فى حياتك حاليا كنت تود وجودهم الان او فى حياة اولادك مستقبلا؟
1-الانسان اللى بتمنه واطفالى طبعا
2- الرسول عليه الصلاه والسلام (ممكن حياتنا كان تتغير عن دلوقتى كتير )

س3: أعطيتك ثلاث وردات .. من هم الثلاث الأشخاص اللى هتهديهم الورد اللى معاك ؟؟
1-عائلتى
2-زوجى مستقبلا
3-اصحابى

س4 : لو أعطيتك ورقة بيها 3 سطور فقط و قلت لك أكتب فيهم اللى أنت عيزه هتكتب إيه ..

بتمنى راحة البال لكل الناس بجد ونفسى كل حاجه وحشه فى حياتنا تختفى من كذب وكره وخيانه وظلم
وطبعا الحكومه بكل صفاتها ربنا يهديها وقتها الحياه هتكون احسن والاهم نحس بالاسلام شويه

سطرين بس اهوه انا طيبه خالص

س5 : ما هو هدفك فى الحياة ؟؟
انشاء اسره مثاليه بمعنى الكلمه

.إن شاء الله بكرة هيكون أحسن من النهارده"س6 : هل تصدق هذه المقولة ؟؟ و لماذا ؟؟
ممكن تكون المقوله دى سبب فى حياتى لغايه دلوقتى مش ممكن لااكيد
بجد بقولها لنفسى 3 مرات فى اليوم قبل الاكل ههههههههههههه
لا بجد مؤمنها بيها اوى
ممكن تكون امل بيخلينى اتمسك شويه بالحياه


س7 : أجمل مقولة سمعتها فى حياتك ؟؟
فى حاجات كتير بس اللى فاكرها دلوقتى
هو اقفل باب الحزن بقفل الرضا

س8 : من المغنى اللى بتحبه أوى و إيه أحلى أغنية ليه بتحبها ؟؟
انا مش ليا حد معين
انا اى مغنى حتى لو مين لو بيغنى رومانسى او حزين بس يكون مؤثر لازم اسمع الاغنيه
يعنى ممكن نقول مطربتى الرومانسيه ومطربى الحزن

وبحب اغنيه شيرين بكلمه منك
بحبها اوووووووى

س9 : غزة" تمثل لك إيه فى حياتك ؟؟
الصبر
بجد كل ما اشوف اللى بيحصل فى اهلها وفيها من كام سنه وهما لسه صابرين بحس انى ولا حاجه بالنسبه ليهم
بتعلم الصبر منهم
وطبعا بحزن على حالهم اوووووووى

س10 : أعطى لإنتمائك لوطنك درجة من مائة ؟
مش عارفه بس يمكن لانى مش بعدت عنها فمش عارفه انتمائى ليها قد ايه
بس الاكيد انى بحبها


س11 : لو تزوجت و أنجبت بنتين و ولدين أى الأسماء تختار لهم ؟؟
امممممممممممممممممم
مش عارفه عمرى ما فكرت فى اسم معين لاولادى
بس فى اسماء كده بتعجبنى من فتره لتانيه
والاكيد ان انا وزوجى اللى هنختار الاسم مع بعض
بس اللى فى بالى دلوقتى

البنات: شيراز ودارين
الاولاد:عبد الله و عمر

س 13 :لو أتعرض عليك رشوة كبيرة و انت فى زنقة ماليه هتعمل إيه ؟؟
اللهم ما ابعدنا عن الحرام
دى الاجابه
اكيد هرفض
وربنا هيفرجها وقتها

س14 : قول 3 صفات ب 3 كلمات بس توصف بيهم شخصيتك
انثى/رومانسيه /غريبه

س 15 : برضه بكلمة واحدة ايه اهم صفة عايزها في شريك حياتك؟
رااااااااااااااااااااااااااااااااااااااااااااااااااااااااااااااااااااااااااااااااااااجل

س16 : ايه المجال اللى غير دراستك وشايف نفسك فيه قوي؟
هههههههههههههههههههههههههههههههههه
دكتوره
مدرسه
مصلحه اجتماعيه
هههههههههههههههههه
لا بجد بحس انى بميل اوى للحاجه اللى ممكن اكون فيه مصدر مساعده لحد معرفش ايه الميول الغريبه دى

س17 : بتحب السفر؟
مش عارفه حسب المود
اصلى حد مزاااااااااااااااااااااااااااااااااجى درجه اولى

س 18 : طب دلوقتى حالا ايه المكان اللى نفسك تكون فيه؟
اى مكان فيه بحر وليل ولوحدى

س19 : تمرر التاج ده لمين ؟؟
طبعا المفروض باقى احلى جروب يقول فاحنا هنتفق مع بعض وبعدين هقول بكره بالكتير يعنى

6اعترافات؟
1-مزاجيه جدااااااااااااااااااا بدرجه رهيبه
2-عصبيه ومتسرعه وطيبه
3- رومانسيه لدرجه صعبه وبعشق البحر بالليل (بس هو فين)وحساسه زياده عن اللزوم
4-مش بعرف انسه اى حاجه فى حياتى ممكن اسامح بس انسه لالالالالالالالالالالالالالالالالالا
5-بحب اهلى واصحابى جدا بس شخصيتى ممكن تعمل عكس كده
6-بخاف جدا من المستقبل وبحب كل حاجه تحصل بسرعه

كفايه كده بجد تعبت
يلا هشوف مين اللى عليه الدور وهقول
سلام

نـــــــــــــــــــور القلب

ana bgd ba7eb a7mad fo2ad negm gddnnn ,,,, w ba7eb a2ralo 7agat ,,,, hwa ana mesh ba2ra kteer coz i hate reading aslan :$ (saree7a gdnn :D) bs fe3lan lma bal2alo ay 7aga ba7eb a2raha even aw2at el kalam byeb2a ..... :S.....:D bs eshta ,, hwa ana ba7ebelo 7agat ya3ny ,,,, w dy men el 7agat elly ana ba7ebaha awyy :D ,,,, bs ana mesh asdy ay 7aga walahy :D,,,, seyasa b2a w bta3 (baree2 ya beeh :D) ,,,,, hope u will like it ;):D

طاطي راسك طاطي طــــاطي

طاطي راسك طاطي طــــاطي

انت ف وطن ديمقراطـــــــي

انت بتنـــعــــم بالحــــــــــرية

بس بشرط تكون مطاطــــــي

لما تكون شغــال بذمــــــــــة

خايف على مصــلحة الأمــة

شغلك يطلع من غير لازمــة

علشان مبيعلاش غير واطي

طاطي راسك طاطي طاطـــي

انت ف وطن ديمـــــقراطي

لما حاميها يكون حراميــه

ا وبلاده ورا ضهره رامـيـها

طالع نازل واكل فيـــــــــها

مسنود بالبدلة الظباطــــي

طاطي راسك طاطي طاطـــي

انت ف وطن ديمـــــقراطي

لما شــقاك يصــبح مش ليك

فقرك سد السكة علــــــــــيك

تتلفّت تلــــقى حـــوالـــــــيك

إما حرامي و إما عقــــاطي

طاطي راسك طاطي طاطــــي

انت ف وطن ديمقراطـــــــي

لماتلاقي بـــــلاد الـدنـيـــــــا

فيها البني آدم حــــاجة تانية

وانت في الطبقات الـــــــدنيا

قرد مسلسل أو وطواطــــي

طاطي راسك طاطي طاطـــي

انت ف وطن ديمقراطــــــي

لما الجهلة يبــــــقوا أمــامــك

أو فوقك ماسكــين ف زمامك

ويسوقك ع الهــلكة إمامك

تشرب م السم السقـــــراطي

طاطي راسك طاطــــي طاطي

انت ف وطن ديمقـــــــراطي

لمــــا الكلـــمة تكون بتدينـك

لما تخبي ف قلـــــــبك دينــك

لما الذل أشوفه ف عيـــــــنك

هات إحباطك على إحباطــــي

طاطي راسك طاطي طاطـــي

NONYA

السلام عليكم ورحمه الله وبركاته
انا مش عارفه اكتب اقول ايه
بس فى مره حد حس انه نصين
وكل نص فى مكان مختلف تماما عن المكان اللى فيه النص التانى
وفى كل مكان من دول واحد وكل واحد بيشدك ليه باكبر قوه عنده
وانت مش عارفه تروح فين
كلام غريب صح
بس ده فعلا احساسى
مش عارفه الصح من الغلط
تايه
ضايعه
محتاره
يعنى خليط من الخوف على الحيره على اليأس
بس فعلا محتاجه بر ارسى عليه
حاسه انى زباله اوى فى دينى
مش بعمل حاجه لربنا
عايشه حياتى بس اكل واشرب وانام
فين دينى من الحاجات دى كلها
اه بصلى واصوم والحمد لله حجابى بدات اظبطه عن الاول كتير
وربنا هيساعدنى كمان وكمان
ان شاء الله
بس ياتره دى يجى حاجه فى الحاجات الكتير اللى ربنا بيعملها لينا
ليييييييييييييييييييييييييييييييييييييييييه
مش قادره اعمل اكتر واكتر
ليه مش بركز فى نص واحد بس
ليه مقسومه بين الدنيا والاخره
ليه كل ما احسن ان خلاص لازم اعيش لدينى
تيجى دنيتى وتقولى لالالالالالالالالالالا وبصوت عالى كمان
هو كل الناس كده ولا انا بس اللى كده
ونفسى دى تقولى لا انتى كده كويسه وبتمشى خطوه خطوه
وانا اقولها لالالالالالالالالا
الناس الكويسه دى احسن منى فى ايه
لو مت دلوقتى هقول لربنا اصل كنت بمشى خطوه خطوه
تناقض رهييييييييييييب فى حياتى الفتره دى
ومش عارفه
نفسى اعدى بقه على بر الامان
نفسى اعيش روحنية الدين
نفسى احس بطهر النفس واطمئنان القلب
بجد اكيد شعور حلو
مش عارفه كتبت البوست ده ليه
بس حاسه ان فى ناس كتير زى
حاسه ان ممكن كده بقوى نفسى عشان اعمل الصح
كده بوعى ناس كتير انهم يبدا يفكروا فى اخرتهم
ممكن اللحظه دى اموت وانا بكتب هلحق اعمل لاخرتى امته
ربنا معانا ياااااااااارب

نــــــــــــور القلب

السلام عليكم ورحمه الله وبركاته


بجد وحشتونى جدا وبلوجنا وحشنى موووووووت

حسه انى بقالى سنه مش دخلته


النهارده وياسمين بتكلمنى فى التليفون وبنتكلم عن غيابنا عن البلوج وعن الظروف اللى مرت بينا

قعدنا نفتكر ذكرياتنا مع البلوج او هقول بيت احلى اصحاب التانى


بجد اجمل ذكريات

بداية فكره البلوج اصلا

يعتبر احنا من اوائل الناس اللى عملت بلوج فى وسط اصحابنا

بتهايلى مش كان فيه غير بلوجه واحده بس وقتها لوحده صاحبتنا (دلوقتى بسم الله ما شاء الله الدفعه كلها بلوجات)

المهم انا فاكره اوى اليوم اللى قررنا فيه نعمل بلوج

كنت انا وياسمين بنتكلم فى التليفون (قصه تليفون باين اقولكم على حاجه بس مش تقولوا لاهلنا

انا وياسمين ناخد الرقم القياسى فى الكلام فى التليفون والفواتير بسم الله ما شاء الله



وفجاه جات فى دمغنا فكرت اننا نعمل انا وهى بلوجه مع بعض

تكون زى بيتنا فيها احزانا وافراحنا

فيها كل مواقفنا الحلوه والوحشه

حاجه خاصه بينا اوى نفرغ فيها كل طاقتنا

وتكون خاصه بينا احنا لوحدنا بس

وتكون بالنسبالنا مكان نتجمع فيه ونسال على بعض وكل واحده تكون عارفه التانيه دخلت ولا لا

ولا ايه مودها النهارده حتى لو مش عايزة تكلم حد مباشرة فهو بالنسبالنا مكان للفضفضه


وفعلا الفكره كبرت فى دماغنا وقولنا بدل ما نكون احنا الاتنين بس قولنا نكون احنا الاربعه

رنا/ دعاء/ ياسمين /ايمان (طبعا بعد فتره راويه بقت معانا فى الاجازه يعنى)

وفعلا عملنها بس كنا هنموت من الرعب ان الفكره لسه جديده ان مجموعه يعملوا بلوج مع بعض

غير اننا بنات وكمان كانت فكره البلوج عموما زى ما قولت لسه مش انتشرت بين اصحابنا


قولنا نجرب فى بلوجه نعملها كده تجريبيه نجرب فيها كل اللى احنا عايزينه

وفعلا ياسمين عملت واحده الاول وقعدنا نلعب فيها شويه

ولما عجبتنا الفكرة على الواقع وقدامنا مسحنا البلوجه الاولى دى وعملنا البلوجه الموجوده دلوقتى


وجينا عشان نختار اسم البلوج

الاسم ده سيما اللى اختارته


بس فعلا اسم على مسمه مش احلى اصحاب بالنسبه للناس كلها طبعا

لا احنا قصدنا احلى اصحاب بنا بنحب بعض بجد مهما نزعل بنرجع لبعض اقوى من الاول

من اول يوم فى الكليه واحنا مع بعض (وطبعا كنا عارفين بعض قبل كده فى الثانوى والاعدادى بس معرفه سطحيه شويه)

مفيش حد بيخبى حاجه عن حد عشنا ادق التفصيل مع بعض

بحلوها ومرها

بجد عمرى ما كنت هتوقع ان يكون ليا اصحاب اكون معاهم بالشكل ده


مفيش اى كسوف من اى نوع بنخاف على بعض بجد

بجد احلى اصحاب شوفتهم فى حياتى وميرسى بجد يا سيما على احلى اسم بلوج شوفتها فى حياتى لانه علينا فعلا



المهم الحمدلله البلوج اتعملت وبدات تعجب الناس

وبدا يشدهم الفكره اننا مجموعه وبنتكلم كاننا بنتكلم طبيعى من غير اى تقيد او احساس ان الناس

بتقرا الكلام وكاننا بجد بنكلم بعض فى كونفرانس واحده


فى الفتره اللى البلوجه بدات تنتشر فيها كان خوفنا بيقل واحده واحده

وكنا بنكون فى قمه سعادتنا لما حد يدخل يقول ان روح البلوج حلوة

بجد كنا بنطير من السعاده

ان صداقتنا فى الواقع اتجسدت فى بيتنا التانى وظهر قد ايه احنا مرتبطين مع بعض لدرجه ان عكست روحنا فى البلوج

انا مش عارفه ليه كل الذكريات دى جت فى بالنا

يمكن عشان خوفنا اللى كنا خايفينه فى الاول على الفكره نفسها

بدات ناس كتير تعمل نفس الفكره


واحساسنا بقه حلو ان فكرتنا كبرت مش معانا بس

لا لدرجه ان الناس عجبتهم وعملوا زيها

مش عارفه

بس لما تحس ان بيتك انت واصحابك

بقه حاجه حلوه الناس بتحب تعملها بجد المفروض نفرح اوى

او احنا فعلا فرحنا اوى


فى النهايه لان حضرتى اتكلمت كتير (ماشى ياسيما هى اللى قالتلى اكتبى انتى عارفه انى لكاكه)

بجد دلوقتى احنا بنكون فى قمه سعادتنا لما نلاقى ردود علينا من اى شخص مش شرط اصحابنا

لان خلاص ده يعتبر احنا واى تقدير للبلوج ده بمواضيعه وافكاره بيكون تقدير لينا احنا





المهم بما ان كل البلوجات اتكلمت على النتيجه واحنا لا

لظروف كتيره


سواء ظرووف مرضى انا اللى طولت شويه

او ظرووف ياسمين التى لا تعد ولا تحصى

او ظرووف رنا وجهازها

او راويه وسفرها

او دعاء وعيب النت عندها


هكتب كلمتين بس عنها

احنا الحمد لله كلنا نجحنا وعدينا 3 الحمد لله عقبال 4 يارب

وطبعا لان كل واحده كان عندها ظروف مش عرفنا نفرح بالنتيجه كويس اوووووى

خصوصا انا لان كنت بموت من التعب والنتيجه باينه

بس برده مش غيرت عادتى فى انى اكون اول واحده فى الشله تعرف النتيجه واتصل بيهم كلهم اصحيهم من النوم ويعرفوا النتيجه على وشى

والحمد لله كل سنه بننجح الحمد لله يارب


وبجد فى النهايه وحشتونا موووووووووووووووووووووت

كل الجروب بجد بيقول الكلمه من قلبه

وربنا معانا ونطلع البلوج تانى من العنايه المركزه بعد الفتره دى

سلام من احلى اصحاب


ملحوظه ////ميرسى على الاهداء بتاع الصوره ميرسى جدا صوره روعه بجد

نـــــــــور القلب

بسم الله الرحمن الرحيم

النهارده عايزة اتكلم معاكم فى موضوع مهم جداا

امبارح سمعت خبر خلانى فى قمة سعادتى

فى وكاله امريكيه عملت استفتاء على اختيار اكثر الشخصيات المؤثرة على مستوى العالم

تم اختيار 100شخصيه ثم تم تصفيتهم الى 20 شخصيه منهم 6مسلميين

الحاجه اللى تفرح اكثر ان من ال 6 دول تم اختيار الاستاذ/ عمروخالد فى المركز السادس على مستوى العالم

فعلا حاجه تفرح وتخلى الواحد فخور انه مسلم ومصرى

فى وسط الفرحه دى وانا فرحانه وقاعده بتكلم عن عمرو خالد

سمعت اعتراضات وانتقادات كتيير عليه وانه لايستحق هذا اللقب

ولما جيت اقول لييه وعايزة اعرف السبب ووجهة نظركم

كان كالتالى :

-انه شخصيه تافهه كثيرة الضحك

-كاجوال لا يحق له ان يتكلم فى الدين بدون لبس عباءة شيخ الازهر

-خريج كلية تجارة ولا يحق له ان يدعو الناس فهو ليس من ابناء الازهر ولا يملك القدرة الكافيه على الدعوة

-والاكثر مصيبه قيل انه قائد ومنظم جماعه وحزب يسعى للوصول الى الحكم عن طريق الشباب

بجد حاجه غريبه وتنرفز والله

هل يستحق عمرو خالد ان يقال عليه هذا الكلام الغير منطقى بالمرة ؟

هل يمكن ان يقال عليه تافه لمجرد انه بيدعو الناس بطريقه حسنه وبيبتسم فى وجوههم؟

هل يمكن ان يقال عليه لا يصلح لمجرد انه لا يرتدى عباءة الازهروليس من ابناءه؟

وكأن شيخ الازهر هو فقط الذى له حق الدعوة

هل يمكن ان يقال عليه انه متطرف ومن الممكن ان يكون ارهابى الاشاعه القادمه لمجرد ان الشباب متخذاه قدوة لهم؟

هل يعقل ان يطرد هذا الرجل من بلده اكثر من مرة ويمنع من دخول بلده؟

هل يعقل ان يكون هذا الرجل يدعو الى الله ويقال عنه هذا الكلام؟

!!!!!!!!!!!!!!!!!!!!!!!!!!!!!!!!!!!!!!!!!!!!!!!!!

اليس هذا من حاول ان يعرف الناس من هو محمد عليه الصلاة والسلام وابرز لهم الكثير من الجوانب التى لم نكن نعلمها عن طريق برامجه؟

اليس هذا من علم الناس تاريخ الصحابه وادخلهم فى ادق التفاصيل وكاننا نعيش معهم فى زمنهم؟

اليس هذا من يدعو الى الدين والدنيا معا ويساعد الناس على عيش حياة افضل متمسكين بالدين ومساعده الاخريين؟

اليس هذا من ساعد العديد من الشباب على مكافحه الادمان وتقليل نسبه البطاله واقامة مشاريع للشباب؟

اليس هذا من ساعد وكان سببا فى هدايه بعض الفتيات وارتدائهم الحجاب؟

شىء غريب فعلا اننا نرفض وجود شخصيه مثل شخصيه عمرو خالد فى وسطنا

لمجرد ان الناس بتتبعه وتسمع كلامه وحجة البعض ان عمروخالد يقول اشياء غلط فى بعض الاحيان

كل انسان عنده القدره على التفكير واختيار الاصلح له

وانتقاء مايقال امامه من كلام وتوجيهها حسب قدراته ورغبته

ولنفرض انه يقول احيانا اشياء خاطئة او غير مقنعه (فهو ليس ملاكا)

لك حريه اختيار ماتفعله واختيار الجانب الجيد من الكلام وترك الجانب السىء

فان كان العيب فى عمرو خالد فالاكثر عيبا ان تتبع اى كلام انت غير مقتنع به

ولكن هل يعقل ان يكون له كل هذة الشعبيه وحب الناس بدون وجه حق؟

هل يعقل ان يكون كل هؤلاء الناس مجرد تباع له بدون تفكير فيما يقوله ؟

شىء غريب فعلا اللى بيتقال ده

وانا مش بدافع او متحيزة لعمرو خالد بس انا فعلا لو فضلت اتكلم عنه مش هقدر اديله حقه

وفى نفس الوقت محبش ان حد يحتكر الدعوة او هدايه الناس لشيوخ الازهر بس

لان من حق كل انسان عنده علم ولو بسيط انه يوصله للناس

وزى مانا بحب عمرو خالد بحب يوسف القرضاوى ومحمود المصرى والعديد من رجال الدين

ليس لى شأن اذا كان من خريجى الازهر او لا ولكن من يتكلم وباسلوب حسن ويدعو الناس بالكلمه الطيبه

وليس بالغلظه او العنف زى اللى فى بعض الشيوخ

اسفه عالاطاله ياجماعه بس الموضوع مهم جداا

واظن ان عمرو خالد من الشخصيات المهمه اللى لازم نتكلم عنها

واعرف ارائكم فيه واذا كان كلامى غلط او صح

منتظرة ارائكم

سلام عليكم

*********************

BosyCaT

الزكريات الم ام فرح ؟؟؟؟؟

الانسان عندما ينجرح لايجد الا البكاء...!!!

ويستمر فيه ثم يبكي

ليتوقف بكاؤه...

ودموع جرحه تعبر عما صار حتى نزلت من عينه...

تكتب على الخد ماتعيشه من ردود الجرح...

فهل من عين بكت من غير جرح؟

هناك اعين تبكي من منظر مؤثر،،،

وجفون تمطر من تذكر شيء مضت عليه الايام...

فهل المنظر المؤثر والذكريات تعد جرحا؟

ام ان أعظم و أعمق جرح هو الذكرى..؟

فالزكرى...

اثقل من الصخر...واخف من المطر...

واعظم شيء...وابسط ماكان ...

هي ابشع الالام...واجمل الايام...

الذكريات تدور بعجله الزمان ولكن الى الخلف!!!

تزكرك بما فات من عمرك

بكل لحظاته سواء الفرح او الالم ...

تضع ما كان امامك...وترسم ما سيكون لايامك...

الذكرى...

هي الحياه...هي الميلاد...

هي البلاد...هي العمر....

وهذه هي الذكريات..

**********************************

BosyCaT

ساعاااااااااااااااااااات الجرح بيريح ساعاااااااااااااااااات الدمع بيهدى

وليه على ايه هنتألم ماهو كله بيمشى ويعدى

مابتقفش الدنيا وادى ناس بتيجى وناس بتروح

يعنى جرح بجرح عادى ومين فى الدنيا مش مجروح

ساعااااااااااااااااااااات الجرح بيريح ساااعاااااااااااااااات الدمع بيهدى

ولييييييييييييييه على ايه هنتألم ماهو كله بيمشى ويعدى

ناس كتير كانوا فى حياتى والنهارده فضلى ايه

الفراق بقه زى عاده وقلبى متعود عليه

نص عمرى فات وادينى مافتكرش فرحت فيه

نفسى اعرف مالها بيا دنيا دى عليا ليييييييييييييه

ساعاااااااااااااات الجرح بيريح ساعات الدمع بيهدى

ولييييييييييييه على ايه هنتألم ماهو كله بيمشى ويعدى

بجد انا مش عارفه بكتب اصلا التوبك ده دلوقتى ليه

بس كل اللى اعرفه انى مخنوقه فوق الوصف

وبقالى كام يوم حالتى حاله بتوصل انى اعيط بجد بساعتين وتلاته من غير ما اعرف السبب عنيا بجد ضاعت

نفسى اوى اقعد مع نفسى بس حكايه الكورسات مش عارفه انقطع وكده

والاغنيه اللى انا كتبتها دى

بجد انا سمعتها قبل كده وعجبتنى جدا

بس المره دى مختلفه سمعتها والمتنى اوووووووووووووووووووووى

اول ما اسمعها بعيط لوحدى (عارفه انه حرام )بس بجد غصب عنى

بحس ان فيها حاجه غريبه بتكلم حاجه جوايا

ممكن لما سمعتها قبل كده كان عادى يعنى مش كنت كده

بس المره دى لما سمعتها كنت فعلا من جوايا حزينه فأثرت فيا اوى

انا من امبارح الفجر عاوزه اكتب التوبك ده

بس لظروف بلوجيه مش عرفت

وعلى فكره مطبقه بقالى يومين

لدرجه انى كل شويه اخلق شغل فى البيت عشان ابطل تفكير والله

كان عندى غسيل امبارح الساعه 1 بالليل

حاله غريبه جدا

ومش كنت متوقعه فى الاجازه دى بالذات

لان كانت متفائله اووووووى للاجازه بس معرفش ايه اللى حصل ليا

عارفه انها هتعدى

ومش كان لازم اقرف الناس بكلامى

بس كنت محتاجه بجد اكتب الكلمتين دول

اه بجد كل كلمه فى الاغنيه بجد ليه تأثير رهيب فيا

ناس كتير كانوا فى حياتى والنهارده فضلى ايه
الفراق بقه زى عاده وقلبى متعود عليه
نص عمرى فات وادينى مافتكرش فرحت فيه
نفسى اعرف مالها بيا دنيا دى عليا ليييييييييييييه

كفايه كده لان بجد خلاص كفايه عياط كده النهارده

سلام

نــــــور القلب